Саха Республикатын Судаарыстыбаннай Мунньаҕын (Ил Түмэн) уонна Хабаровскай кыраай Сокуону таһаарар Думатын икки ардыларыгар бииргэ үлэлээһин туһунан сөбүлэһиигэ илии баттанна. Илии баттааһын сиэрэ-туома балаҕан ыйын 13 күнүгэр Хабаровскай кыраайга Саха Өрөспүүбүлүкэтин күннэрин ыытыы чэрчитинэн буолан ааста.
 
Сөбүлэһиини илии баттааһыны Ил Түмэн бэрэссэдээтэлэ Виталий Басыгысов уонна Хабаровскай кыраай Сокуону таһаарар Думатын бэрэссэдээтэлэ Сергей Хохлов баттаатылар. Манна Ил Түмэн депутаттара Ольга Макиенко, Альбина Поисеева, Дмитрий Горохов, Виктор Губарев, СР правительствотын бэрэстэбиитэллэрэ, кыраай парламенын депутаттара сырыттылар.
 
«Бу сөбүлэһии – көннөрү историческай түгэн эрэ буолбатах. Бу биһиги үлэбит уонна Дальнай Востоктааҕы федеральнай уокурук икки улахан субъектарын олоҕун-дьаһаҕын бары өрүттэригэр үтүө, ыаллыы сыһыан салҕаныыта. Көдьүүстээх бииргэ үлэлээһиҥҥэ бастакы хардыы оҥоһулунна: биһиги Саха сиринээҕи коллегаларбыт уопута туһаныллыбыт, хотугу табаны иитиини өйөөһүн туһунан регионнааҕы сокуон Думаҕа көрүллэр. Ол курдук, биһиги кыттыһан регион хотугу норуоттарын проблемаларын быһаарабыт», - диэн бэлиэтээтэ Хабаровскай кыраай парламенын спикерэ Сергей Хохлов.
 
Бу сөбүлэһиигэ этиллэринэн, Саха сирин уонна Хабаровскай кыраай парламеннарын бииргэ үлэлээһиннэригэр сүрүн туһаайыыларынан буолаллар – Госдумаҕа сокуону көҕүлээһиннэри, РФ нормативнай-правовой аакталарын тупсарыы туһунан этиилэри судаарыстыбаннай былаас федеральнай уорганнарыгар бэлэмнээн киллэриигэ үлэни сүрүннээһин, ону сэргэ регионнааҕы сокуону таһаарыы процеһын, сокуоннары толорууга парламент хонтуруоллуур ньымаларын тупсарыы, ыччат парламентаризмын сайыннарыы. Бииргэ үлэлээһин сүрүн көрүҥнэринэн көрсүһүүлэри, консультациялары, кэпсэтиилэри ыытыы, сокуон барылларын кыттыһан бэлэмнээһин, бэрэстэбиитэллээх уорганнар мунньахтарыгар кыттыы, үлэлиир бөлөхтөрү кыттыһан тэрийии, сокуону таһаарыы эйгэтигэр уопуту атастаһыы буолуохтара.
 
«Биһиги регионнарбытын бүгүн олус үгүс сибээстиир. Аҕыйаҕа суох уопсай проблемалары быһаарыахпытын уонна сирбит-уоппут кыахтарын кыттыһан сайыннарыахпытын наада», - диэтэ Ил Түмэн бэрэссэдээтэлэ Виталий Басыгысов.
 
Итини таһынан Виталий Басыгысов СР президенэ Егор Борисов аатыттан республика социальнай-экономическай сайдыытыгар үтүөлэрин, доҕордоһууну, нациялар икки ардыларыгар или-эйэни бөҕөргөтүүгэ улахан кылаатын иһин, өр сыллаах үлэтин бэлиэтээн, уонна Саха сирэ Россия састаабыгар киирбитэ 380 сылынан сибээстээн, кыраай Думатын бэрэссэдээтэлэ Сергей Хохловка «Саха сирэ Россияны кытта 380 сыл» үбүлүөйдээх бэлиэни туттарда.
 
Сергей Хохлов наҕараада иһин махтанна уонна бииргэ үлэлээһини салгыырга этии киллэрдэ: «Бу сөбүлэһиигэ олоҕуран биһиги позицияларбытын күүһүрдүөхпүтүн уонна регионнарбыт олохтоохторун уйгутун туһугар өссө көдьүүстээхтик үлэлиэхпитин сөп».