Көрсүһүү кэмигэр Виталий Басыгысов уонна Михаил Николаев алтыс ыҥырыылаах Госдума депутаттарыгар быыбар түмүктэрин, Россия парламенын икки палататын саҥа структураларын, федеральнай таһымҥа сокуону оҥоруу сорох уратыларын уонна сүрүн хайысхаларын, чуолаан бу үлэҕэ регионнар сокуону таһаарар уорганнарын кыттыытыгар сыһыаннаах боппуруостары дьүүллэстилэр.

 

Государственнай Мунньах бэрэссэдээтэлэ уонна Государственнай Дума депутата дойдуга буолар политическай быһыы-майгы тирээн турар боппуруостарыгар, республика социальнай-экономическай сайдыытыгар, партийнай тутууга бэйэлэрин санааларын атастастылар. Бииргэ үлэлээһин барыллааһын былаана торумнанна.

 

Ааспыт күннэргэ Михаил Николаев Саха Республикатын президенэ Егор Борисовы кытта көрсүһүүтүгэр Госдума депутаттара уонна Федерация Сэбиэтин чилиэннэрэ регион баһылыгын кытта үгэс буолбут көрсүһүүлэрин сөргүтэргэ этии киллэрбитэ.

 

Республика бастакы президенэ маннык көрсүһүүлэр уопсай соруктары муҥутуур чопчулааһыҥҥа туһалаах буолуохтара диэн санаалаах. Ити, биир өттүнэн, сокуону оҥорууга уонна Саха Республикатын интэриэстэрин федеральнай таһымҥа туруулаһыыга парламентарийдар үлэлэригэр улахан көдьүүһү уонна тус сыалы-соругу биэриэхтээх.

 

Маны таһынан, Виталий Басыгысов республика инновацияҕа уонна наукаҕа государственнай кэмитиэтин салайааччыта Максим Трофимовы кытта көрүстэ.

 

Максим Трофимов бу кэмитиэти 2011 сыл бэс ыйыттан салайар. Көрсүһүүгэ биэдэмистибэ былааннарын дьүүллэһии буолла. Ол курдук, кулун тутар 22-23 күннэригэр Дьокуускайга республика инженердэрин съеһэ ыытыллара былааннанар.

 

Ону таһынан, 2012 сылга Наука күнүн уонна Рационализатор-саҥаны айааччы күнүн быраһынньыктарын туһунан кэпсэтии буолла.

 

Виталий Басыгысов инновацияҕа уонна наукаҕа государственнай кэмитиэт үлэтигэр бэйэтин баҕа санааларын иһитиннэрдэ, санааны атастаһыы барда.