Күндү студеннар, үөрэнээччилэр уонна преподавателлэр!
 
Саха Өрөспүүбүлүкэтин Ил Түмэнин аатыттан Россия студеннарын күннэринэн эҕэрдэлиибин.
 
Студенныыр кэм – истиҥ доҕордоһуу, ыраас таптал арыаллаах эдэр саас кэрэ кэмэ, айар-тутар, киэҥ билиини-көрүүнү ылар, киһи быһыытынан үүнэр-сайдар, олох үөрүйэхтэрин баһылыыр үтүө сыллар. Бүгүҥҥү көлүөнэ студеннара биһиги хотугу өрөспүүбүлүкэбит эрэ буолбакка, бүтүн дойду кэскилин түстүүр улахан эппиэтинэһи сүгэллэр. Үөрэх кыһатыгар  ылбыт билиигит инникитин үрдэллэри дабайан үүнэргитигэр-сайдаргытыгар тирэх буолан, туруоруммут соруккутун толорорго кыах биэриэҕэ.  
  
 Саха сирин орто уонна үрдүк идэлээх үөрэҕин тэрилтэлэрэ Россия үөрэҕин ситимигэр дьоһун кэккэҕэ тураллар. Россия 27 регионыттан уонна 16 араас дойдуттан кэлэн үөрэнэр сүүрбэ тыһыынчаттан тахса студеннаах М.К.Аммосов аатынан Хотугулуу-Илиҥҥи федеральнай университет өрөспүүбүлүкэ  тулхадыйбат киэн туттуута буолар. ХИФУ саҥаттан саҥа кирбиилэри ситиһэн, саҥа саҕахтары арыйан, үрдүк үөрэх уонна наука эйгэтигэр сонун уларыйыылары түстүүр бастыҥ холобурунан буолар. Университет үөрэтэн таһаарбыт араас көлүөнэ ыччаттара бүгүн Саха сирин социальнай-экономическай сайдыытыгар дьоһун кылааты киллэрэллэр. Үрдүк уонна орто үөрэх кыһаларын преподавателлэригэр эдэр ыччаты үөрэтиигэ уонна иитиигэ сыралаах үлэҕит иһин дириҥ махталбын тиэрдэбин.
 
Саха Өрөспүүбүлүкэтин Ил Түмэнэ идэлээх үөрэх уонна ыччат бэлиитикэтин эйгэтигэр туһуламмыт сокуоннары тупсаран оҥорууга,  ыччат үөрэнэр быраабын хааччыйыыга, сайдар кыаҕын арыйыыга  утумнаах үлэни ыытар. Судаарыстыба бэлиитикэтэ ситиһиилээхтик ыытыллара ыччат түмсүүлээх үлэтиттэн, көхтөөх кыттыытыттан тутулуктаах.
 
Студеннарга билии чыпчаалыгар тиэрдэр дьаныардаах үөрэхтэригэр үрдүк ситиһиини, дьолу-соргуну, ыраас тапталы уонна или-эйэни баҕарабын.
 
 
Александр Жирков,
 Саха Өрөспүүбүлүкэтин Ил Түмэнин Бэрэссэдээтэлэ