Илин эҥэр улуустарын газ оттугунан хааччыйыы программатын быһыытынан, 2013-2014 сс. магистральнай газопровод ситимин Майа – Табаҕа – Чурапчы хайысханан салгыы тутар, Мэҥэ-Хаҥалас улууһун Төҥүлү, Тумул, Бөкө, Бэдьимэ, Суола, Хорообут бөһүөлэктэригэр киллэрэр үлэ бара турар. Төҥүлү бөһүөлэгэр күөх оттук магистральнай турбата кэлэн турар. Бу газопроводтан Төҥүлү, Тумул бөһүөлэктэрин дьиэлэригэр газ киириэхтээх. Программа быһыытынан, Төҥүлүгэ, Тумулга ыытыллар үлэ 2013 сылга түмүктэниэхтээх этэ. Ол кэнниттэн магистральнай турба Балыктаахха, Маттаҕа барыахтаах.

Александр Жирков салалтатынан Төҥүлүгэ ыытыллыбыт мунньах сүрүн төрүөтүнэн Төҥүлү уонна Тумул бөһүөлэктэригэр газ оттугу киллэриигэ улахан бытаарыы тахсыбыта буолла.

 

Быһааран эттэххэ, лоп курдук биир сыл анараа өттүгэр Саха Республикатын Экономикаҕа уонна промышленнай политикаҕа министерствота бу бөһүөлэктэр объектарыгар уонна дьиэлэригэр газ оттугу киллэрэр үлэлэргэ үс тэрилтэни кытта дуогабар түһэрсибитэ. Олортон икки тэрилтэ былааннаах үлэлэрин толорон иһэллэр. Онтон  Петр Иванов салайааччылаах “Якутгазстрой” тэрилтэ 42 мөл. сууммалаах үлэни 28 мөл. тахса үбүлээһиҥҥэ оҥоруом диэн конкурсу кыайан баран, араас төрүөтүнэн сыл устата ылыммыт үлэтин толорбото. Онон, экономика министрэ Ольга Федорова этэринэн, бу күннэргэ Төҥүлү объегар хаттаан күрэх биллэриллэр буолла.

 

Тэрилтэ салайааччыларын кытта үлэ хаамыытын дьүүллэһии түмүгэр өссө биир кыһалҕа баара көстөн таҕыста. Ол курдук, бк икки бөһүөлэги газ оттугунан хааччыйар инниттэн түөрт квартальнай котельнай газ оттукка көһүөхтээх. Олортон билигин биир эрэ котельнай бэлэм.

 

 Александр Жирков: “Газ оттугу киллэрии уонна коммунальнай хаһаайыстыбаны саҥардыы программаларын икки ардыгар маннык аалсыы тахса турар. Онон Экономика министерствота уонна Коммунальнай хаһаайыстыба министерствота улуус салалтатын кытта бу боппуруоһу суһаллык быһаарсаллара ирдэнэр. Итинник дьаһамматахпытына үлэбитин эһиил баччаҕа да кыайан түмүктүөхпүт суоҕа”, - диэн эттэ. Кырдьык, котельнайлар кэмигэр бэлэм буолбатахтарына объектарга итиини биэриигэ улахан бытаарыы тахсыан сөп.

 

“Бөһүөлэктэрбитигэр газ киириитэ бытаарбытын көрө сылдьабыт. Тоҕо бытаарбытын араас тэрилтэ салайааччыта араастаан быһаарар. Онон өйдөммөппүт элбээн испитэ. Бүгүн бу үлэнэн дьарыктанар тэрилтэлэр салайааччылара бары түмсэн дьон-сэргэ иннигэр дьэ киһилии, үчүгэйдик быһааран биэрдилэр. Правительство, Ил Түмэн бу биһиэхэ улахан суолталаах үлэни дьаалатынан ыыппаттарын, хаамыытын кэтии, салайа олороллорун итэҕэйдибит”, - диэн олохтоохтор  мунньах түмүгүн сөбүлээбиттэрин биллэрдилэр.