Саха Республикатын народнай депутата, Государственнай Мунньах (Ил Түмэн) дьиэҕэ-уокка, коммунальнай хаһаайыстыбаҕа уонна тутууга сис кэмитиэтин бэрэссэдээтэлэ Николай Костромин уматык-оҕунуох матырыйаалларыгар уонна транспорт өҥөтүгэр сыана үрдээһинин кэтээн көрөр хамыыһыйатын салайар.
 
Бу хамыыһыйа «Биир ньыгыл Россия» партия регионнааҕы политическай сэбиэтин президиумун быһаарыытынан тохсунньу 23 күнүгэр тэрилиннэ. Салайааччынан республика народнай депутата Николай Костромин ананна.
 
Хамыыһыйа чилиэннэрэ сыананы мониториннааһыны бастайааннай төрүккэ олоҕуран өрөспүүбүлүкэ муниципальнай тэриллиилэригэр ыытыахтара, бэрэбиэркэлэр түмүктэрин ырытар сурук партия регионнааҕы политсэбиэтин сэкэритээригэр бэриллиэҕэ.
 
Бу үлэ чэрчитинэн Николай Костромин 2011 сыл ахсынньытыгар уонна 2012 сыл тохсунньутугар ГСМ сыанатын туһунан «Саханефтегазсбыт» ААО, «ЯТЭК» ААО, «Сибойл» ХЭО салайааччыларыттан ыйытык оҥордо.
 
Тэрилтэлэр салайааччылара сыана зоналарынан уонна батарыы туочукаларынан нефть бородуукталарыгар кууһунан уонна бытархай атыы сыаналарын туһунан мунньуллубут иһитиннэриини суһаллык биэрэ оҕустулар. Холобур, «Саханефтегазсбыт» ААО генеральнай дириэктэрин экономикаҕа уонна үпкэ солбуйааччы Владимир Лоскутников иһитиннэрбитинэн, 2011 сыл бэс ыйыттан ГСМ атыылыыр сыана уларыйа илик эбит.
 
Сотору ГСМ уонна транспорт өҥөлөрүн сыаналарыгар мониториҥҥа хамыыһыйа састааба талыллыаҕа.
 
Ил Түмэн пресс-сулууспата