Ольга Григорьева аатын театр искусствотын сэҥээрээччилэр иһирэхтик ахталлар. Кини 1974 сыллаахха Щепкин аатынан үрдүкү театральнай училищены кыһыл дипломунан бүтэриэҕиттэн, Ньурба драматическай театрыгар уһуннук, айымньылаахтык үлэлээбитэ. Бииртэн-биир чаҕылхай уобарастары айан хаалларбытын күн бүгүҥҥэ диэри умнубаттыы саныыллар.

 

Ольга Михайловна 1991 сыллаахха Үөһээ Бүлүү Боотулутугар олохсуйбута. Кэргэнэ Николай Тихоновтыын төрөөбүт нэһилиэгин дьонун-сэргэтин түмэн, драмколлектив тэрийбиттэрэ. Ольга Григорьева бу олохтон барыар диэри театр алыптаах эйгэтигэр бэриниилээҕин көрдөрбүтэ. 2001 сыллаахха коллектив норуодунай театрын аатын ылбыта. Театр дириҥ хорутуулаах, киэҥ ис хоһоонноох үлэтинэн тыа сирин олохтоохторун кэрэ эйгэтигэр умсугуппута. Алампа, Платон Ойуунускай, Далан, Суорун Омоллоон, Тимофей Сметанин, Мария Обутова-Эверстова уонна олохтоох автордар Мария Матахова, Прокопий Прокопьев, Мария Тебенева айымньыларынан испэктээкиллэр турбуттара. Боотулу театрыттан айар кынаттанан эдэр талааннар үүнэн тахсыбыттара. Олортон биирдэстэрэ, Дьулустан Семенов, Щепкин аатынан училищены бүтэрэн, Үүнэр көлүөнэ театрыгар айымньылаахтык үлэлиир, Саха Өрөспүүбүлүкэтин үтүөлээх артыыһа буолла. Кинини көрөөччүлэр «Снайпер саха» уус-уран киинэҕэ сүрүн оруолу оонньообутунан билэллэр.

 

Боотулу норуодунай театра оҕолорго “Хотойдор хоту көтөллөр” либретто туруоран өрөспүүбүлүкэтээҕи көрүүгэ кыайыылаах буолбута.  “Сайылыкка тахсыы» театрализованнай дьүһүйүүтэ эмиэ өрөспүүбүлүкэҕэ бастыҥынан ааттаммыта. Боотулулар “Ньургун Боотур” олоҥхону 1994 сыллааххха ЮНЕСКО делегациятыгар ситиһиилээхтик туруоран,  биһирэбили ылбыттара. 

 

Саха театрыгар буолбут ахтыы киэһэтигэр Ил Түмэн үөрэххэ, култуураҕа, наукаҕа, СМИ уонна уопсастыбаннай холбоһуктар дьыалларыгар сис кэмитиэтин бэрэссэдээтэлэ Антонина Григорьева бу курдук бэлиэтээн эттэ: «Ольга Григорьеваҕа анаммыт киэһэ үс театр көҕүлээһининэн, кини талааныгар сүгүрүйээччилэр үтүө санааларынан, сомоҕолоһуу күүһүнэн, кэрэҕэ тардыһыынан тэрилиннэ. Бу күннэргэ биһиги Ньурба театра тэриллибитэ 50 сылын киэҥник бэлиэтиэхпит. Ньурба театрын албан аатын ааттаппыт, үтүө суолу-ииһи хаалларбыт дьон ортотугар Ольга Григорьева  ураты чаҕылхай, талааннаах киһи буолара көстөрө. Кини оонньообут оруолларын умнубаттык өйдүүбүн. Өрөспүүбүлүкэҕэ 70-тан тахса норуодунай театра баарыттан Боотулу театра айымньылаахтык үлэлиир. Боотулулартан аныгы кэмҥэ чаҕылхай талааннар үксүү-үүнэ турдуннар», -- диэн баҕа санаатын тириэрдэн туран, Боотулу театрын билиҥҥи салайааччыта Варвара Буртаховаҕа Ил Түмэн аатыттан эҕэрдэлээн, бэлэҕи туттарда.