Ил Түмэн салалтата уонна сис кэмитиэттэрин председателлэрэ муус устар 9 күнүгэр Үөһээ Бүлүү улууһун делегациятын кытта көрүстүлэр. Делегация Үөһээ Бүлүү улууһа тэриллибитэ 80, Улуу Кыайыы 70 сылларыгар, Россияҕа Литература сылыгар, республикаҕа Урбаан сылыгар анаммыт Үөһээ Бүлүү Күннэрин Дьокуускайга ыытыынан сибээстээн, республика Правительствотыгар, министерстволарга, биэдэмистибэлэргэ, Ил Түмэҥҥэ сылдьар, улуус Күннэригэр киэҥ культурнай программаны ыытар.  
 
Көрсүһүүгэ парламент спикерин бастакы солбуйааччы Анатолий Добрянцев, спикери солбуйааччы Ольга Балабкина, парламент Хонтуруоллуур кэмитиэтин председателэ Александр Уаров, бюджекка, үпкэ, нолуок уонна сыана политикатыгар, бас билии уонна приватизация боппуруостарыгар сис кэмитиэт председателэ Юрий Николаев, тыа сиригэр уонна аграрнай политикаҕа сис кэмитиэт председателэ Дмитрий Саввин, доруобуйа харыстабылыгар, дьиэ кэргэн, оҕо, ыччат дьыалаларыгар, физкультураҕа уонна спорка сис кэмитиэт председателэ Юрий Баишев,  сир сыһыаннаһыыларыгар, айылҕа баайыгар уонна экологияҕа сис кэмитиэтин председателэ Владимир Прокопьев, мандаат уонна регламент хамыыһыйатын   председателэ Марфа Филиппова уонна да атыттар кытыннылар. Улуус баһылыга Владимир Поскачин уонна улуус мунньаҕын председателэ Семен Михалев салайан илдьэ кэлбит улуус делегациятын састаабыгар нэһилиэктэр баһылыктара, улуус мунньаҕын депутаттара бааллар. Көрсүһүүнү Ил Түмэн депутата, мандаат уонна регламент хамыыһыйатын   председателэ Марфа Филиппова иилээн-саҕалаан ыытта.  
 
Көрсүһүү саҕаланыытыгар Анатолий Добрянцев Ил Түмэҥҥэ маннык көрсүһүүлэр утумнаахтык ыытыллалларын, бу иннигэр Нам, Дьааҥы улуустарын делегациятын кытта көрсүбүттэрин бэлиэтээтэ. Кини улуустан кэлбит дьоҥҥо Ил Түмэн структуратын, фракцияларын, кэмитиэттэрин, сокуону оҥорор үлэтин, ылыллыбыт сокуоннары олоххо киллэриини хонтуруоллааһын туругун, парламент федеральнай сокуоннары көҕүлүүр үлэтин билиһиннэрдэ. Спикер солбуйааччыта Ольга Балабкина улуус салайааччыларын Владимир Поскачины, Семен Михалевы уонна улуустан кэлбит делегация састаабын Үөһээ Бүлүү улууһа тэриллибитэ 80сылынан уонна Дьокуускайга улуус Күннэринэн эҕэрдэлээтэ.  “Үөһээ Бүлүү улууһа Саха сирин атын улуустарыгар майгыннаабат ураты улуус буолар. Улуус ити уратыларыттан биирдэстэринэн Үөһээ Бүлүү республика уон инники кэккэкҕэ сылдьар улуустарын иһигэр баара, улуус дьаһалтатын хамаандата бары сүрүн боппуруостары быһаарыыга биир сүбэнэн түмсүүлээхтик үлэлээһинэ, улуус аатын үрдэтиигэ биир санаалааҕа буолар”, -- диэн туран, кини Үөһээ Бүлүү улууһун сайдыытыгар бүгүҥҥү күҥҥэ туох ирдэбиллэр туралларыгар тохтоото. 
 
Ыйытыы уонна кэпсэтии бэрээдэгинэн барбыт көрсүһүү кэмигэр улуус бэрэстэбиитэллэрэ сүрүннээн Үөһээ Бүлүү улууһун Бүлүү өрүс хаҥас биэрэгэр олорор уонча нэһилиэги үрдүк күүрүүлээх уотунан эбэтэр айылҕа гаһынан ититиллэр ситимҥэ холбооһуну туһааннаах программаҕа киллэртэрии, улууска 2017 сылга былааннаммыт Манчаары оонньууларын ыытыыга бэлэмнэниинэн сибээстээн, тутууну ыытыыга үбүлээһин проблемаларын быһаарыы  боппуруостарын  тула кэпсэттилэр. Ити кэпсэтиилэргэ норуот депутаттарын өттүттэн Анатолий Добрянцев, Юрий Николаев, Дмитрий Саввин, Юрий Баишев,  Владимир Прокопьев, Марфа Филиппова кыттаннар, улуус делегацията көтөҕөр боппуруостарын быһаарар суолларга тус көрүүлэрин, санааларын эттилэр уонна инникитин улуус нэһилиэктэрин үрдүк күүрүүлээх уотунан эбэтэр айылҕа гаһынан ититиллэр ситимҥэ холбооһуну туһааннаах программаҕа киллэртэрии боппуруоһугар парламентскай истиилэри ыытан, көмөлөһөргө бэлэмнэрин биллэрдилэр. Владимир Прокопьев Үөһээ Бүлүү, Ньурба улуустарын энергетиканан, гаһынан, үрдүк күүрүүлээх уотунан ититэр ситиминэн хааччыйыы боппуруоһа уталытыллыбат суолталааҕын бэлиэтээн, бу боппуруоһу күһүҥҥүгэ көрөргө сыҕарыппакка, Ил Түмэн былааныгар бэс ыйынааҕы парламентскай истиилэригэр киллэрэр сөптөөҕүн туһунан этиитэ өйөннө.
 
Улууска спорт кэмитиэтин салайааччыта Егор Алексеев: “Манчаары оонньуулара наар биир стадион иһигэр 4-6 көрүҥ тэҥинэн, хааһы курдук, ыытыллан кэллэ. Дьон истэригэр-көрөрүгэр олох табыгаһа суох. Онон маны арыый аҕай бэрээдэктиэххэ. Спорт национальнай көрүҥнэригэр куоталаһыылар биир стадион иһигэр баппаттар. Онон үс  көрүҥү -- национальнай уонна хотугу многоборьелары, оҕунан ытыыны -- биһиги Нам нэһилиэгэр ыытары былаанныыр этибит. Суола оҥоһулуннаҕына улуус кииниттэн уонча мүнүүтэлээх эрэ айан. Онон Нам нэһилиэгэр оскуола интернат тутуллуохтаах. 200 спорсмены түһэрэн туспа күрэх ыытар буоллар бэрээдэктэниэ этэ”, -- диэн маны норуот депутаттара өйүүллэригэр санаатын үллэһиннэ.
 
Ити курдук икки өттүттэн дьыалабыайдык, интэриэстээхтик барбыт көрсүһүү уопсай хаартыскаҕа түһүүнэн түмүктэннэ.
 
Ил Түмэн пресс-сулууспата