Көрсүһүүгэ Ньурба улууһун баһылыгын социальнай боппуруостарга солбуйааччы Анна Уларова, Дьокуускай куоракка олохтоох Ньурбалар түмсүүлэрин салайааччыта Аркадий Саввинов, Ньурба улууһун Дьокуускайга бэрэстэбиитэлэ Игорь Яковлев, «Ньурбакаан» уопсастыбаннай түмсүү салайааччыта Алевтина Николаева, «Баай Тиит» устудьуоннар уопсастыбаннай түмсүүлэрин салайааччыта Семен Поликарпов, нэһилиэктэр түмсүүлэрин салайааччылара Михаил Егоров, Николай Дьяконов, Артем Александров уонна устудьуоннар кыттыыны ыллылар.  

 

Антонина Григорьева:«Эдэр саас хас биирдии киһи олоҕор умнуллубат кэрэ бэлиэ кэм. Бу сылларга киһи олоҕун инники тутула ууруллар, саҥа саҕахтар арыллаллар. Быйыл Ньурбаттан орто окуоланы 229 оҕо бүтэрэн Дьокуускай куоракка араас үөрэх кыһатыгар үөрэнэ кэллэ. 81 оҕо үрдүк үөрэххэ, 148-һа орто анал үөрэхтэргэ үөрэнэ сылдьаллар. Биһиги бүгүҥҥү түмсүүбүт сыала-соруга, төрөөбүт улууспут сайдыытын туһугар инники үлэбитин былааннааһын буолар. Ньурбаттан төрүттээх саҥа үөрэххэ киирбит уонна үөрэнэ сылдьар устудьуоннары кытта көрсүһүүбүт сылын аайы былаан быһыытынан ыытыллар. Эдэр ыччакка билигин саамай тоҕоостоох кэм, туруоруммут сыалы ситиһэргэ судаарыстыба көмөтө баар. Ол иһин кыах баарын тухары, үрдүк дабайыылары, үчүгэй түмүктэри ситиһиэххэ сөп. «Баай Тиит» устудьуоннар уопсастыбаннай тэрилтэлэрэ тэриллиэҕиттэн улуус ыытар үлэтигэр актыыбынайдык кыттар. Бастаан тэрийбит оҕолор билигин номнуо үлэһит буолан улууспут, республикабыт сайдыытыгар кылааттарын киллэрэ сылдьалларыттан үөрэбит, астынабыт», - диэн көрсүһүүнү саҕалаата.

 

Салгыы Антонина Григорьева «Баай Тиит» устудьуоннар уопсастыбаннай тэрилтэлэрин актыыбынай кыттыылаахтарыгар, быйылгы сылга үрдүк көрдөрүүлээх, ыччаттарга холобур буолар устудьуоннарга Людмила Егороваҕа, Маргарита Герасимоваҕа, Максим Васильевка, Иннокентий Васильевка, Алина Куличкинаҕа инникитин да ситиһиилэри баҕаран туран, сис кэмитиэт Бочуотунай Грамотатын туттартаата.

 

Көрсүһүү кыттыылаахтара устудьуон оҕолорго эдэр саас эриэккэс кэмнэрин умнуллубаттык, чаҕылхайдык атааралларыгар, төрөөбүт дойдуларын сайдыытыгар күүс-көмө, тирэх, өй-санаа буолар дьоһун үлэһит дьон иитиллэн тахсалларыгар баҕардылар.

 

Ыччаттар биир дойдулаахтарбыт эрэллэрин түһэн биэрбэккэ, бары өттүнэн сайдыылаах, түмсүүлээх буолуохпут диэн санааларын эттилэр. Инники былааннары торумнаатылар, үлэ хайысхаларын чуолкайдаатылар, дойду ахтылҕанын туһунан ырыа ыллаатылар. Былаас уонна уопсастыбаннай тэрилтэлэр күүстэрин холбоон үлэлээһиннэрэ, гражданскай уопсастыба сайдыытыгар үтүө түмүктээх буолар диэн биир санааҕа кэллилэр.

 

Сэтинньи 4 күнүгэр бэлиэтэнэр Норуот сомоҕолоһуутун күнүн чэрчитинэн, көрсүһүү кэннэ эдэр ыччат соторутааҕыта Дьокуускай куоракка саҥа аһыллыбыт Россия историятын сэһэргиир аныгылыы хабааннаах музейга быыстапкаҕа сырыттылар.

 

Сис кэмитиэт бэрэссэдээтэлэ Антонина Григорьева ыччаттарга туһаайан:«Киэҥ билиилээх, сайдыылаах дьон буоларга эдэр сааскытыттан дьулуһуҥ, үөрэхтээх, үлэлээх дьон буолан төрөөбүт дойдугутугар туһаны аҕалыҥ», - диэн түмүктээтэ.